SILATURRAHIM DARI RUMAH KA RUMAH, MALAM JUM'AT MANGHADAPI RAMADHAN 1443H
Malam Patamo :
Sairiang balam jo barabah
Balam lalu barabah mandi
Balam taruih masuek rimbo
Sairiang salam jo sambah
Salam lalu sambah kumbali
Salam tatuju ka kito basamo
اَسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ
إِنّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَعُوْذُ بِاللهِ مِنْ شُرُوْرِ أَنْفُسِنَا وَسَيّئَاتِ أَعْمَالِنَا مَنْ يَهْدِهِ اللهُ فَلاَ مُضِلّ لَهُ وَمَنْ يُضْلِلْ فَلاَ هَادِيَ لَهُ أَشْهَدُ أَنْ لاَ إِلهَ إِلاّ اللهُ وَأَشْهَدُ أَنّ مُحَمّدًا عَبْدُهُ وَرَسُوْلُهُ
اَللهُمّ صَلّ وَسَلّمْ عَلى مُحَمّدٍ وَعَلى آلِهِ وِأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن
Angku-angku Niniek Mamak, nan gadang basa batuah. Kayu gadang ditangah padang. Batangnyo gadang tampek basanda, ureknyo tampek baselo, badaun nan rimbun, tampek balinduang dek kapanasan, tampek batadueh dek kahujanan. Buahnyo manih dapek dimakan, dimakan anak sa nagari.
Alim Ulama jo Imam, Khatib, sulueh bendang dalam nagari, panarang jalan ka sarugo.
Apak-apak Cadiek Pandai, urang cadiek candokio, ka pai tampek batanyo, pulang tampek ba barito.
Ibu-ibu Bundo kanduang, limpapeh rumah nan gadang. Tampek mintak makan dagang lapa, tampek mintak minum dagang hawih.
Para Pemuda, parik paga dalam nagari, bapantang kampuang kamaliangan, haram lanun dapek masuek, dek kuat paga mahalangi.
Para Pemudi, suntiang nagari, nan elok laku rancak budi.
👳 Baa kaba sanak sakalian nan di rahmati Allah.SWT. Kiro-kiro apo topik dialog nan rancak kito bicarokan malam Jum'at patamo silaturrahim bageleh manghadapi Ramadhan 1443H kito ko.
👪 Baitu mah Ustadz. Silaturrahmi sambie kito batuka pikiran nan bantuek iko, rancak bana kito budayakan. Kok dapek balanjuik taruih manaruih manjalang mato mangantuek sadudah Ramadhan . Manyonsong atau manghadapi kadatangan tamu istimewa kito, bulan suci Ramadhan 1443H ko, kiro-kiro apo nan pantas jo paralu kito lakukan Ustadz ?
👳 Oh baitu, rancak tuh sanak. Bakumpue satangah jam mampaarek silaturrahim sambie batuka piikiran, bakawan sagaleh kopi dari rumah ka rumah. Manjawab tanyo dunsanak tadi untuek malam patamo silaturrahim kito ko, manyonsong bulan Ramadhan itu apo nan paralu di pabuek. Jawabannyo pendek sajo sanak. "Balimau...!"
👪 Apo pulo tuh Ustadz ramuan Balimau manyambuik Ramadhan tuh ?
👳 Baitu mah sanak. Balimau itu makasuiknyo kan mambarasiehkan diri. Nan kito makasuik tantu tatuju ka urusan ibadah salamo bulan Ramadhan 1443H supayo diredhai Allah.SWT. Apo lai kito di Minangkabau punyo falsafah nan ndak lakang dek paneh, ndak lapuek dek hujan. Adat nan Basandi Syarak, Syarak basandi Kitabullah. Syarak mangato, adat nan mamakai. Satantang jo masalah ibadah supayo dapek ridha Allah.SWT, tantu kato Syarak nan harus kito pakai. Jan sampai Balimau justru mambaok kito jadi dilaknat Allah.SWT.
Contohnyo sanak :
Mandi-mandi bapasangan atau bacampue aduek laki-laki jo padusi bukan karabat, aurat tabukak, salanjuiknyo pabuatan nan dilaknat Allah.SWT lainnya pun tapanciang. Nan bantuek itu jaleh malangga kato Syarak, lah samo jo kito mandi dalam luluek, batambah kumue malah jadinyo.
👪 Jadi bantuek apo nan Balimau sabanonyo Ustadz, bulieh nak tarang jalan ka ditampue...?
👳 Baitu mah sanak. Ganti ka maingekkan di nan lupo atau manjagokan nan takalok. Ambo cubo manjawab sado bisa, nan cukuik bana tantu Ulama nan labie tau.
Nan paralu kito pahami bana adolah Balimau itu makasuiknyo mambarasiehkan diri. Untuek manyonsong atau mahadapi datangnyo bulan nan suci, kito pantas basuci diri dulu.
👳 Dunsanak sakalian nan di rahmati Allah.SWT.
Balimau marupokan tradisi masyarakat kito dari dulu bilo ka mamasuki bulan suci Ramadhan. Hal iko mungkin tradisi jo budayo nan memang harus kito patahankan, bahkan kito lestarikan. Namun sairiang adat istiadat di Minangkabau nan dak lakang dek paneh, ndak lapuek dek hujan, dalam mahami tradisi Balimau, kito tantu ndak bulieh jaueh dari falsafah "Syarak mangato, Adat nan mamakai". Karano pada hakikatnyo, balimau nan dimakasuik dalam tradisi jo budayo kito di Minangkabau adolah mambarasiehkan diri atau jiwa dari daki jo kotoran budi, baik pado pribadi, pado kaluarga, pado masyarakat sakitar kito, apo lai pado kaduo urang tuo. Karano kito ka mamasuki bulan nan barasieh suci, yaitu bulan Ramadhan, mako talabieh dahulu kito harus barasiehkan akal jo budi mahadapinyo.
👳 Dunsanak sakalian nan di rahmati Allah.SWT.
Mungkin sajo memang tradisi balimau nan lah mambudaya dalam masyarakat kito, didorong dek riwayat yang lah populer di masyarakat kito, nan artinyo :
"Katiko Rasullullah.SAW sadang khutbah Jum'at (di bulan Sya’ban), baliau lalu mengucapkan Amin sampai tigo kali. Para sahabat baitu mandanga Rasullullah.SAW mangucapkan Amin takajuik, lalu sato pulo mengucapkan Amin. Tapi para sahabat binguang, kanapo Rasullullah.SAW mangucapkan Amin sampai tigo kali. Baitu salasai shalat Jum’at, para sahabat bertanyo kepado Rasullullah.SAW. Baliau pun menjalehkan: “Katiko ambo sadang khutbah tadi, datang Malaikat Jibril lalu babisiak, hai Rasullullah.SAW, Amin-kan do'a ambo iko yo,” dijalehkan dek Rasullullah.SAW.
Baliau malanjuikkan,
Do’a Malaikat Jibril itu adolah: “Ya Allah tolong abaikan puaso ummat Muhammad.SAW, apobilo sabalun mamasuki bulan Ramadhan nyo indak malakukan hal-hal yang barikuik :
Patamo : Indak saliang ma'af talebieh dahulu jo keduo orang tuanyo (kalau masih ado).
Kaduo : Indak saliang ma'af talabie dahulu antaro laki bini.
Katigo : Indak saliang ma'af talabie dahulu jo dusanak nan ba tatanggo".
👳 Dunsanak sakalian nan di rahmati Allah.SWT.
Talapeh dari riwayat itu hadits nabi atau bukan, karano dari keterangan ulama atau kitab hadits nan dicubo pulo mancari, ambo juo alun ma namukan asa jo usuenyo. Tapi nan pasti saliang mama'afkan diantaro kito sasamo Muslim adolah marupokan tradisi rancak nan paralu dilestarikan. Saliang ma ma'afkan diantaro kito dalam mamasueki bulan Ramadhan, marupokan salah satu usao untuek kito mambarasiehkan akal budi sarato manjago silaturrahim, sabagai wujud nyato tradisi Balimau nan sasuai jo falsafah Syarak mangato Adat nan mamakai. Karano manjago silaturrahim sarato saliang ma'af sasamo kito marupokan Sunnah Rasulullah.SAW nan harus kito amalkan, sarato mamuliakan kito dalam pandangan Allah.SWT.
عَنْ أَبِي هُرَيْرَةَ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ مَا نَقَصَتْ صَدَقَةٌ مِنْ مَالٍ وَمَا زَادَ اللَّهُ عَبْدًا بِعَفْوٍ إِلَّا عِزًّا وَمَا تَوَاضَعَ أَحَدٌ لِلَّهِ إِلَّا رَفَعَهُ اللَّهُ.
"Dari Abu Hurairah radhiyallahu 'anhu, dari Rasulullah shallallahu 'alaihi wasallam, baliau basabda, "Sadakah itu indak ka mangurangi harato. Indak ado urang nan maagie maaf kapado urang lain, malainkan Allah SWT ka manambah kamuliaannyo. Dan Indak ado urang nan marandahkan diri pado Allah.SWT, malainkan Allah ka maangkek darajatnyo" (H.R Muslim 8/21)
👳 Dunsanak sakalian nan di rahmati Allah.SWT.
Dalam upayo manjago sarato malestarikan tradisi Balimau ka mamasuki bulan suci Ramadhan 1443H, tigo hal nan mungkin paralu kito tumbuehkan dalam satiok diri kito :
Patamo, Mahindari hal nan mungkin ka marusak silaturrahim sasamo kito, nan ka marusak nilai ibadah kito pado Allah.SWT, baiek ka mamasuki maupun salamo bulan suci Ramadhan dan baitu juo sadudahnyo. Rasulullah.SAW alah maingekkan :
رُبَّ صَائِمٍ لَيْسَ لَهُ مِنْ صِيَامِهِ إِلاَّ الْجُوعُ
“Barapo banyaknyo urang nan bapuaso, tapi ndak mandapekkan apo-apo, salain hanyo rasa lapar” (HR. An-Nasai dan Ibnu Majah)
الصِّيَامُ جُنَّةٌ ، فَلاَ يَرْفُثْ وَلاَ يَجْهَلْ ، وَإِنِ امْرُؤٌ قَاتَلَهُ أَوْ شَاتَمَهُ فَلْيَقُلْ إِنِّى صَائِمٌ
“Puaso adolah parisai, mako siapo nan sadang bapuaso jan parnah berkato kumue jo maupek. Bilo sasaorang mehino atau maajaknyo be
batangka, mako katokanlah : ambo sadang bapuaso” (Muttafaq ’alaih)
Kaduo, Maluruihkan niat untuek ibadah sakuat mungkin salamo Ramadhan jo harapan samato-mato maharapkan ridha-Allah.SWT. Kato Rasulullah.SAW :
إِنَّمَا الأَعْمَالُ بِالنِّيَّةِ ، وَإِنَّمَا لاِمْرِئٍ مَا نَوَى
“Sasungguahnyo sagalo amal tagantuang pado niatnyo dan sasungguahnyo sagalo urang akan mandapek apo nan nyo niatkan” (HR. Bukhari dan Muslim)
مَنْ صَامَ رَمَضَانَ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ
“Siapo sajo nan bapuaso Ramadhan karano iman jo maharokkan parhitungan (pahala dari Allah.SWT) ka diampuni doso-dosonyo nan lah balalu” (Muttafaq ‘Alaih)
Katigo, Baharap bulan suci Ramadhan 1443H jadi kasempatan nan paliang rancak untuek kito mampabanyak ibadah, manuntun akal jo budi sasuai falsafah Adat mangato Syarak nan mamakai, sampai akhirnya Allah.SWT redha manampekkan kito sebagai insan Taqwa nan dijanjikan-NYO. Sakap pamurah, suko ba sidakah, sarato mampabanyak ibadah sunat di bulan Ramadhan marupokan sikap mulia nan patuik dicontohkan dari Rasulullah.SAW.
كَانَ رَسُولُ اللَّهِ – صلى الله عليه وسلم – أَجْوَدَ النَّاسِ ، وَكَانَ أَجْوَدُ مَا يَكُونُ فِى رَمَضَانَ حِينَ يَلْقَاهُ جِبْرِيلُ ، وَكَانَ يَلْقَاهُ فِى كُلِّ لَيْلَةٍ مِنْ رَمَضَانَ فَيُدَارِسُهُ الْقُرْآنَ ، فَلَرَسُولُ اللَّهِ – صلى الله عليه وسلم – أَجْوَدُ بِالْخَيْرِ مِنَ الرِّيحِ الْمُرْسَلَةِ
“Rasulullah.SAW adolah urang nan paliang pamurah dan kamurahan baliau mamuncak di bulan Ramadhan katiko Jibril manamui baliau. Jibril manamui baliau satiok malam untuk tadarus Al-Qur’an. Sunggueh Rasulullah.SAW labieh pamurah hati malakukan kabaikan dari pado angin nan barambuih”. (HR. Bukhari)
Allah.SWT memang mautus Rasulullah.SAW supayo di tauladani dek ummat baliau.
لَقَدْ كَا نَ لَكُمْ فِيْ رَسُوْلِ اللّٰهِ اُسْوَةٌ حَسَنَةٌ لِّمَنْ كَا نَ يَرْجُوا اللّٰهَ وَا لْيَوْمَ الْاٰ خِرَ وَذَكَرَ اللّٰهَ كَثِيْرًا
"Sunggueh, lah ado pado (diri) Rasulullah.SAW itu suri tauladan nan rancak untuek kalian (yaitu) untuek urang nan maharokkan (rahmat) Allah sarato (kadatangan) hari Kiamat jo nan banyak maingek Allah."
(QS. Al-Ahzab 33: Ayat 21)
👳 Dunsanak sakalian nan di rahmati Allah.SWT.
Jo tatap malastarikan tradisi Balimau mamasuki bulan suci Ramadhan, jo caro maluruihkan niat sagalo karajo karano Allah, mampabanyak mintak ampun pado-NYO, mampabaiki silaturrahmi antaro kito, nan lah barumah tanggo manjalang mintuo, anak pisang manjalang bako, sarato mahindari sagalo hal nan tabu manutuik adat jo syarak, insya-Allah kito bisa manunaikan ibadah salamo Ramadhan sasuai jo nan paliang rancak dalam pandangan Allah.SWT,
آمِيْنَ يَارَبَّ الْعَالَمِيْنَ
Akhirnya harapan kito, samoga Ramadhan 1443H sampai manggiriang kito manuju insan mulia disisi Allah.SWT jo julukan Insan nan Taqwa, sasuai jo nan dijanjikan Allah.SWT.
يَا أَيُّهَا الَّذِينَ آَمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ
“Hai urang-urang nan baiman, diwajibkan pado kalian bapuaso sabagaimano nan lah diwajibkan pado urang-urang sabalun kalian, agar kalian manjadi urang nan bataqwa” (QS. Al Baqarah: 183)
👳 Dunsanak sakalian nan di rahmati Allah.SWT. Lah cukuik lamo kito batuka pikiran malam patamo ko. Duduek lah taraso panek, dibaok tagak antah kok paniang. Laruik malam bana beko ba lalokkan, khawatir kok talambek shalat subueh. Lah cukuik banyak pulo Ustadz tadi ba surah, nan bana datang dari Allah.SWT, kok dapek jadi pakaian kita basamo. Nan salah dek kurang Ustadz, mohon dunsanak ma ma'okan, malam barikuiknyo kito batamu baliek.
Rami anak rang koto ranah
Mamaga laman jo saliguri
Kok randah dek lah marimbo
Elok dirambah pado di racun
Samo data kasadonyo
Bungo tanah indak nyo mati
Nan bana datang dari Allah
Jadikanlah banta pangalang diri
Kok salah dek kurang ambo
Pado Allah.SWT mamintak ampun
Mintak ma'af ka dunsanak sadonyo
Jo salam ambo akhiri...
وَاسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ
Komentar
Posting Komentar